你做得到嗎?

晏晝同公司同事食飯, 聽到我老細講o左一個佢去印度旅行一個經歷. 佢幾年前去印度o既時候, 參觀o左一個當地人o既葬禮儀式, 原來按印度o既傳統習俗, 一個人死之後, 會安排火葬, 但同我地唔到, 唔係只係隔住個鐵門按一個掣就了事, 根據我老細話, 佢地o既火葬儀式, 由河邊洗屍, 裹屍, 燒屍, 收拾骨灰均要由死者最親o既人負責, 寸步不得離開, 而整個火葬過程均唔可以有任何哀傷, 激動o既情感表現, 因為佢話其實依個葬禮儀式係一個淨化過程, 希望死者可以透過最親o既人o既手協助佢升上淨土, 所以如果o係儀式中途死者感受到親人捨不得o既感情, 死者就因為留戀親人而唔可以順利歸天......

事先聲明, 我唔係唸住o係度討論依個葬禮儀式, 其實每個國家, 或者宗教都有佢o地唔同慶祝/悼念o既儀式, 每一個儀式都有佢o地o既獨有/代表/象徵意義, 我對每個儀式都相對尊重, 所以唔存在批評成份. 只係, 我聽完依個故事(!?)之後, 我就o係心入面問自己, 如果有一日我所愛o既人身故 (家人, 親戚, 朋友, 甚至我o既寵物也好), 我可唔可以好似印度人咁冷靜去處理一個葬禮呢? 我唔知自己係唔係屬於一個感情豐富o既人 (但我承認我係會因為某一o的事情感觸而喊o既人...), 但係要我完全唔帶有任何感情成份而去處理一個儀式.... 我唸我點都真係做唔到.... 再者, 相對我o地中國人, 唔係話葬禮一定要喊苦喊忽... 但如果其他人見到你好冷靜o既時候, 對方就會覺得係冷血.... 當然, 依個最後都係有關習俗問題.... 我都只係有感而發.... 但係唸深一層, 其實o係死者o既角度o黎睇, 究竟係希望見到你笑住送佢, 冷靜面對定好唔捨得咁送佢走呢...????