今日feifei五歲喇~!!!

不經不覺, feifei來到我家己經有五個年頭, 想起當初依隻女來到我家既時候, 對所有事物都很是好奇, 而且一秒都唔可以離開我身邊半步範圍, 只要稍有遠離佢多一點, 或者下令將佢困係籠入面, 佢就會吠個不停, 可要知佢係一隻拉布拉多犬, 即使當時年齡尚小, 但叫聲還是延嚇人的, 還記得當年為左唔俾佢再亂吠叫, 真係用左一個幾唔人道既方法....

五年喇, 佢都已經由初到我家時,由一個半階磚身位, 慢慢的長到依家擁有三個階磚身位的體型, 小時候既陋習(隨處便溺, 將我及我家人既鞋, 鞋帶, 手提電話等東西咬得體無完膚)都已經完全戒掉, 唯一未有改變既, 相信都係佢胃食到爆既性格同黐身得不得了既女性特質... 而且, feife已慢慢成為我一個長期既聆聽者, 沒有養寵物的可能不明白, 但係, 當你有唔開心, 或者有事係不吐不快既時候, 你既寵物就會成為最好既傾訴對象, 對住佢地, 真係可以不停講, 而且佢地會望住你, 好似真係好耐心咁聽你傾訴, 自然地你就會忘卻心中既煩悶, 比起養那些所謂電子蛇貓狗溫情得多.

自問對feifei稱不上是一個盡責的好爸爸, feifei自小體質較差, 皮膚問題由其嚴重, 但係多年來始終未能完全治佢皮膚上既問題; 而有些日子, 曾對佢愛理不理, 有一段時間沒有負起照顧佢既責任, 更曾因為佢的出現而跟家人鬧不和, 所以今日feifei長大了, 更覺得要比以往更盡力的照顧佢, 過去的已經唔可以回頭, 現刻唯有好好照顧feifei至百年歸老, 好好跟佢渡過每一個生辰...

feifei, 生日快樂~~!!!